भोजपुरी ग़ज़ल
गांव के खुश्बू भूल के गर्दा शहर के फांके आइल बा
असली दौलत छोड़ के नकली माल कमाये आइल बा
माई के हाथ के लिट्टी चोखा सत्तू ठेकुआ छोड़ के अब
केतना लोग शहर में छुछे रोटी खाये आइल बा
खेत बगईचा इनरा पोखर महुआ गूलर सरसों धान
जब्बो आंख मुदाइल आंख में सपना इहे आइल बा।
पहिला प्यार भइल जेकरा से अब्बो गांव में बीया ऊ
लोग दवाई छोड़ के शहर दर्द बढ़ावे आइल बा
चांद सितारा जुगनू बारिस सगरो पिंक लिफाफा में
रख के भेजs ले बीया बुचिया डाकीया लेके आइल बा
याद त होखबे कsरी तहके सावन के पहिला बरसात।
माई कहे दे खs धरती पर बादर घुम्मे आइल बा
मंज़िल सामने बाटे तब्बो बइठ के सोचत बानी हम
हमरे जइसे आखिर केतना लोग इहां ले आइल बा
गांव से शsहर जाये वाली ट्रेन प चढ़ते लागेला
आत्मा पीछे छूट गइल बा देह अकेले आइल बा
राजीव कुमार
No comments:
Post a Comment