भोजपुरी गीत बिहान
अपने ताकत के ना आजमावल गईल
हाथ से हाथ जे ना मिलावल गईल
दिल में दियरी न जबले जरावल गईल
प्रेम के गीत मिल कि ना गावल गईल
तबले सूरज से कहत रही आसमान
कहिया होई बिहान
कबले होई बिहान
खेत खलिहान में सब उजर जाई हो
सबके सपना भी आंखी में मर जाई हो
घsर जर जाई बाचल रही बस महल
ए मूसीबत के मीली ना कौनो बदल
हथ मल के कही नौजवान आ किसान
कहिया होई बिहान
कबले होई बिहान
मांग करब तू हक के त गाली मिली
कब्बो गोली मीली कब्बो लाठी मिली
अपने भय के मिटा द जमाना मिली
ना त ठेहा मिली ना ठिकाना मिली
उठ के पुछे ला ना जे तू खोल ब जबान
कहिया होई बिहान
कबले होई बिहान
ए से पहिले अन्हरिया निगल जाये सब
केहू पूछे की जीवन मिली हमके कब
कबले घर होई कबले मिली नौकरी
गांव में हमनी के कबले आई खुशी
ना त जियते जी सब इंहवां होई जियान
कहिया होई बिहान
कबले होई बिहान
राजीव कुमार
No comments:
Post a Comment